Thursday, March 31, 2022

Apr 2022

四月。

點解不停強調要放棄港股,你睇下保險股就明。美國上市嘅保險股已經升到你唔會買之際,香港上市嘅保險股就仲喺度尋緊底。

係呀,加息利好保險股呀,然後市況唔就,投資左大陸房地產等等,總之幾十樣理由令到你睇中嗰隻唔升。睇錯輸錢就心甘命抵。睇中都輸錢你玩埋我嗰份。如果唔係香港有一大堆MPF,然後又一大堆打工仔懶得理自己個MPF portfolio求求其聽人點買港股,應該就唔止跌呢個數。

Smart Money好現實,永遠會搵最好賺嘅地方賺錢。你睇港股一池死水,十幾年得個吉,你係D鬼佬管住幾百億做價值投資,會唔會價值投資港股﹖

投資界其中一樣最誤人嘅說話就係價值投資,然後大部分人就因為咁要等股價跌先捨得買股票,因為咁樣先有足夠嘅「安全邊際」。唔係唔啱,你買嗰隻股票真係全世界最優質嘅企業就係嘅。同埋你要分到主力資金係因為乜野原因走貨。如果係大量贖回,或者資金鏈出問題而被逼走貨,你啱。但如果唔係,而係D資金用腳投票走人,你走去接貨,都唔係唔得,可能你啱呢係咪﹖

正所謂熊貓都會生仔丫,機會好微囉但係。

所以港股係咪真係唔買得,唔係。你等佢升番D先。個市見底,同個市回升,係兩個概念唻。唔好成日覺得個市見底就撲入去,有排你等呀。

Wednesday, March 9, 2022

Mar 2022

三月。

烏克蘭打得如火如荼之際,香港人關心嘅係林鄭又將防疫搞到一鑊粥咁,所以兩年前香港打到七彩嗰陣,你其實真係覺得國際上好多人關心你﹖有D野,永遠要靠自己。

Joe Biden廢物一個,歐洲買俄羅斯怕,只敢制裁唔敢出兵,口惠而實不至,人命矜貴,唔想世界大戰等等,唔打當然有十萬個理由。歐洲並不重視烏克蘭,但問題係普京佔領烏克蘭後,會否進一步攻歐,呢種風險,德國人就最清楚。

打仗對股市嘅影響,根據歷史而言,好少last到好長,除非你真係世界大戰,咁可能直接停市你都唔駛煩。但可能性咁低,而家呢D叫局部戰爭,而個市又因為咁on99咁跌左,唔大唔細都算係一個幾唔錯嘅機會。

個市跌到今時今日,貴股未平,但都已經唔算貴,如果可以忍受大約20% downside的話,可以開始慢慢買貨。 當然,我仲係一如以往,睇好科技龍頭,另外執行力良好嘅零售股都幾唔錯,銀行股亦比之前更值得買。畢竟買股票,唔好成日諗住食最後一口價先叫贏,用合理嘅價錢買入好嘅公司,都係一個幾好嘅投資策略。

講講香港樓價。香港政府講壓抑樓價講左十年,陳茂波居然宣佈加按揭成數,即係乜野意思﹖睇香港樓價我成日拎以下呢張圖唻講:

 

03年起,香港樓價就同美國high yield有極高嘅correlation。原因係:

1. 聯繫匯率,香港資產價格或多或少受影響,有較高correlation好合理。

2. 香港實際生產力呢二十年唻冇根本改進,於是整個房產市場就變成受利率主導。

問題係,如圖可見,呢個high correlation由2019年中開始出現變化。美國高息企業債受惠於貨幣泛濫而水漲船高之際,香港樓市就打橫行。搞清楚先,唔係跌先叫走資嘅,一個市場應升唔升,做開trade嘅人就應該知道有問題。所以唔好再同我講香港冇走資喇,自己呃自己。

恆指20000就算穿都應該唔會再大插,畢竟而家真係平,又會吸引D遊資入場,炒兩轉又再跌過咁,鍾意炒波幅嘅不妨,我就麻麻。