簡單講基本分析

題外話，執筆之時，Elon Musk喺twitter話想賣10% Tesla，睇唻星期一都好難唔跌。不過我暫時唔會沽貨，至於會唔會執平貨，就睇佢跌到幾多啦，回得十幾%的話我覺得又無謂，事但，反正唔急，一於佛系。

今日想講少少分析股票嘅方法。

炒開港股嘅人應該都有以下經驗：一隻二三線嘅股票，連續幾季業績好好，管理層乘機講遠大目標，做大做強，彎道超車等等，而你對該行業嘅了解，同其他投資者冇乜分別，即係間公司做嘅業務唔係你嘅專長，簡單D講你唔識判斷間公司嘅前景，只能夠聽管理層吹。

如果你嘅分析方法係以基本因素為主的(即係唔多睇圖)，以上呢段說話有幾大重點：

1. 如果你睇好一個行業， 你應該揀該行業嘅一線股票，而唔係貪平買二三線，冇著數。一個行業要起飛，龍頭通常起多D，因為資源較多，規模經濟等等。好多人鍾意炒落後，但你自己問心，炒股票咁多年，最後係炒落後有錢落袋，定坐龍頭等幾年有錢落袋丫﹖

2. 如果你睇好嘅行業龍頭，喺個市都只係二三線股票，咁我都勸你唔好買。好簡單，咁即係代表嗰行唔多掂。隻馬係跛嘅，個騎師幾叻都假。

3. 連續業績好好，而股價未上，通常投資者思考嘅自然係：下幾季業績係咪可以持續。你要自己思考下幾個重點：

1. 管理層講嘅未來幾年可以達到嘅規模，係咪可以做到，有D乜野重要因素可以左右到呢個estimation。
   
2. 更重要嘅係，你要諗下有乜野重大風險，係可以令原本順風順水嘅生意受阻。(此所以我叫人暫時唔好掂中概股，補習都犯法嘅國家我點估風險﹖ON9)
3. 龍頭企業，你見佢今季升幾成，你可能會覺得呢個係例外，下季可能回落，特別係管理層有心guide down嘅時候。呢樣就要認真思考，最好對主要product有一定認識，咁會易判斷好多。
4. 真係唔識嘅，買少隻股票賺少個錢，唔死人嘅。

4. 千祈唔好信爬頭論。一間龍頭企業要跌落唻唔容易，二線公司要爬頭更加難，通常真係有本事做到嘅，間公司會勁到盲嘅都睇得出，帶動哂成個行業升級，例如2000年頭嘅Google同Apple，06年賣書賣到成行成市嘅Amazon，同幾年前嘅Tesla同Netflix。如果唔係，一味管理層吹到天花龍鳯，唔好信。

5. 至於連份年報都睇唔明嘅公司，更加唔好買。呢種情況港股特別明顯。有時睇唔明唔係你嘅問題，係間公司年報真係寫得衰。我試過睇一間做IT service嘅公司(都算係我專長丫大佬)，睇足五年年報都完全唔知佢係做緊乜，呢D公司我話知你邊間大基金有投資啦，總之我就惹唔起。好嘅公司，除非做嘅野好專門(例如biotech我真係冇呢個knowledge)，如果係做大眾化生意嘅，一般都容易理解。