知易行易的投資方法

如果有人或開班授徒，或茶餘飯後傾囊相授，你必須記住，一個人投資分析的方法可以有很多種，但會教人的，只有以下兩類：

1. 知易行難，教左你都用唔著，或極難用
2. 冇用的投資方法

至於好用又易用的投資方法存在嗎﹖當然存在，一句就講完：

買指數基金

手續費及管理費平，回報一般，方法極之科學。但你會買咩﹖會上網睇財經blog的人，點會買指數基金﹖我有堂兄十幾年前買落盈富，有閒錢就買落去，十幾年來，積埋積埋應該唔少，特點是，雖然知道我做金融，但他從不問我有關股票的事。我相信佢亦唔多會上網留意財經新聞。

此謂之廉頗式投資法，悶悶地贏，但大家總是覺得廉頗老矣，宜將剩勇追窮寇，而忘記城外是戰國第一殺人王白起。

老生常談，忽然提起，是因為女友說其妹於家中湊B悶悶地，想炒下股票解悶順便搵下外快，問下我意見。

我仲有乜說話好講。