Tuesday, April 30, 2019

將港元轉美金

FOR唔太識財經嘅親戚朋友們。

https://hk.finance.appledaily.com/finance/realtime/article/20190426/59532581

呢單野其實好重要,我又唔明大家好似仲好老神在在咁一D都唔擔心。
管理大型基金嘅經理,好多唔止炒股票,好多時投資重心放喺債,商品期貨,同埋各國貨幣。原因,當然是因為股票交易量偏少,大型基金要進出都花太多時間。公開交易嘅股票是純投資/投機物品,但債,商品及貨幣,由於有日常需求,流通量大很多,都因此方便大型基金操作。

我講呢樣野嘅原因,係想提提大家,頂,人地呢範專家唻架,唔係叫你諗都唔諗就信到十足,你都用個腦諗下,睇下人地寫乜先丫。

原文喺度,我簡單譯一下重點,然後再講:
https://www.zerohedge.com/news/2019-04-25/quiet-panic-kyle-bass-hong-kongs-looming-financial-political-crisis

重點:
1. 2001年中國加入世貿後,香港被逼由轉口港轉型為服務型經濟,特別是同時成為主要為大陸提供服務的服務型經濟。

2. 08年金融危機後,香港更受惠於美國的貨幣擴張政策。由於聯繫匯率,香港必須跟隨美國的貨幣政策,但同時當時香港的最大貿易伙伴,中國,卻以增加信貸的方式刺激本國經濟。香港的房地產因而推至全球平均呎價最貴的地方。而香港的居民,銀行,及公司,因而大幅借貸。香港現時的私人貸款比率為全球最高。2010年,香港GDP年增長率為7%,同年卻跟隨美國實施零利率。香港亦因此而處於前所未遇的繁榮。

3. 回顧之前歐洲銀行危機時的冰島,愛爾蘭及塞浦路斯。全部危機的主要原因,都是因為這些國家當時容許銀行業增長至本國GDP的10倍以上,以致一旦本國經濟出現小問題,即會摧毀本國經濟。現時香港銀行體系規模為GDP的8.5倍,其中的2.8倍為對中國的直接借貸。

4. 更甚者,本地兩大英資銀行,即渣打及匯豐,現時缺少英國存戶。一旦出現問題,英國政府可不會出手相助。介時出手的很可能會是中國政府,而他們可能不會同時拯救外國存戶,更肯定不會拯救外資銀行的股東。

5. 於是,香港金管局面對典型的囚徒困境:歷來最高槓杆,每月更新的按揭浮動利率,及美國正在上升的利率。現時Hibor與美國Liber差距為80點子。於自由市場,資金自然會由較低利率貨幣流向較高利率的貨幣。如果情況持續,金管局首先會用盡超額準備金(即金管局的aggregate balance)。而過去一年,金管局已消耗80%準備金。一旦準備金用盡,香港必須加息,而銀行體系會隨之倒塌。

6. 世界上實施聯匯率的地方,幾乎全部依靠被錨的一方的財政操守。被錨一方(主要是美元)歷史上都有穩定的財金政策及財政紀律。唯08年金融危機後,美國政府有史以來第一次實施零利率。以現時美國與香港之間的經濟不再同步,於香港實施聯匯不再是合理之舉。美國、中國與香港的經濟週期差異,將無可避免地撕毀聯匯。而以現時香港與美國之間的利率差距,亦理應將港元兌換成美元然後賺取額外的利息。

7. 回顧歷史,政權從無動機去提醒投資者。2015年初,歐洲委員會主席被問及希臘債務問題時,指出並不會違約。而最後希臘的國債於當年違約,債權人損失80%本金。而從無人會於事前解釋違約或貨幣脫勾的潛在風險。阿根廷於2001年取消聯匯時,匯率對美元為一兌一,現時,是43對1,即阿根廷的貨幣取消聯匯後,十九年來兌美金貶值97%以上。

8. 若中港引渡罪犯條例獲通過成為正式法例,美國政府將難以繼續實施《香港關係法》。英國政府同時指香港越來越一國一制,而此與聯合聲明不符。

9. 現時香港仍然是中國獲得美金的重要來源,而中國嚴重缺乏美金,因此,香港對中國依然非常重要。

好,做完文抄公。我講下我睇法。

1. 現時大家炒股炒到興烚烚,全世界覺得美國今年唔敢加息。做基金嘅要衝業績係唔係都要跟炒一份我好明白,但一般投資者都信到十足我有D奇。我覺得今年加息機會大,因為美國下年大選,而美國大選年,極少加息。今年唔加,下年要頂到11月,你係FED,你今年加唔加﹖一加,唔駛多,就0.25,個市由預期唔加都實際加0.25,反應可以好大。

2. 我早就講,香港由03年開始,成個經濟就係靠低利率煲出唻嘅,呢樣野,你搵番D high yield bond index同香港樓價,兩張圖拍埋一齊,就會明白。有咁耐風流,就有咁耐折墮,低利率如果可以直到永遠,呢個世界就唔會有利息呢回事。可惜,全世界科技業始終掌握喺美國手上,而科技業嘅地位,越唻越重要,咁就注定美國經濟一定會重新向上,而唔會好似日本咁衰足30年。再加上中美貿易戰應該就快有結果,美國就算唔完全扭轉兩國的貿易的順逆差,都會大幅改善原本嘅貿易逆差,然後預計2020年美國會由原油輸入國變成輸出國,其實我唔係好明,點解大家仲係覺得美國冇本錢加息。

3. 好,到香港。條引渡條例一通過,實際上等同將香港嘅司法權直接讓番俾大陸。現時香港政府,行政長官是共產黨直接委任的,立法會有一半功能組別而政府有能力控制過半數,分組點票下,立法機關亦等同由共產黨直接控制。再加上司法權都被收編。一國兩制其實就玩完左好耐,不過你一日唔郁個法院,大家都仲喺度自欺欺人(除左誠哥),你一郁,就IQ得50嘅都知道一國兩制玩完。而玩完嘅結果,當然就係資本外逃。資本外逃然後加息,香港經濟自然就會仆直。明乎此理,就知道,呢條引渡條例,香港政府今次志在必得。佢一日唔搞掂個司法系統,一日去唔到下一步全面收編香港。

4. 一旦經濟爆煲,一街負資產好似03年咁,當年都好多人埋怨聯匯。上次時機未到,今次就肯定郁手。唔淨係我咁講,東亞銀行主席李國寶先生,幾個月前都指,港元遲早會改為同人民幣掛勾,只係時間問題。

5. 共產黨唔會取消港元,但一定會取消聯匯。好多人一聽BASS講金管局用完準備金會加息就衝出唻話人地錯,因為香港有外匯儲備成萬億。你估人地會唔知﹖嗰一萬億,你覺得係你嘅,但共產黨覺得應該係佢嘅,但外匯儲備,唔可以用唻起高鐵,唔可以用唻起三跑,都唔可以用唻起港珠澳同人工島。點算﹖簡單啦,咪將港元由同美元掛勾,改做同人民幣掛勾,咁於是呢,呢一萬億,就要用唻向中國買入人民幣,而D美金,就自然賣左俾共產黨。人民幣係共產黨自由印嘅,印幾多幾時印都從來唔會話你知,但你D美金就實實在在。我前幾年都唔明點解梁振英要駛咁多橫手唻夾高樓價,條印花稅白痴都知係會令樓價乾升嘅。而家咁諗就自然明哂,你唔搞一大堆負資產出唻,點有藉口郁個聯匯﹖

6. 所以,真係用完準備金,金管局唔會完全唔用筆外匯基金,但加息可以解決嘅問題,我係佢都唔用,更何況冇人會白痴到用哂筆儲備唻頂住個匯率嘅,你班友又真係可以覺得我而家有一萬億做子彈你咬我食呀咁,肯用二三千億唻救你算執到。基金佬要狙擊貨幣就計數架啫。人地可以leverage唻沽空你香港政府唔可以,你估一萬億真係好多咩。

7. 而更加重要嘅係,你而家唱美金,蝕少少差價,然後你去做美金定期,三個月就回到本,留番D日常資金係港幣就好夠。貶值呢D風險,留番俾D愛國愛港嘅維園阿伯啦。

8. 同埋,其實好多銀行富有戶都已經密密咁轉緊錢走。有錢佬就冇死錯人,特別係講起錢嘅時候就更加唔會死錯呢班有錢人。你唔信邊個有錢佬,都唔該信下李嘉誠。你覺得長和系冊遷,資金轉向投資歐洲,係誠哥臨老懵左﹖你懵都未輪到佢懵啦。

1 comment: