何時賣股票

前幾日，有朋友問在下，騰訊可以到$440嗎﹖

我很奇怪為何有此一問，再問之下，原來朋友是想待騰訊升至$440時沽出持貨。

在下學股票的過程，回想起來頗為僥倖。有兩個一般投資者常用的指標，我於決定買入/賣出(或建議買入/賣出)時，幾乎由始至終從沒有考慮過。

第一個是看市盈率，第二個就是目標價。

須知道散戶輸錢原因之首，就是止賺而不止蝕。而散戶為甚麼會時常止賺不止蝕，原因就是因為有目標市盈率及目標價。

你$10買入，設定目標價$20。兩個月後到價了，你沽唔沽﹖
相反，你$10買入，不幸兩個月後跌到得$7，你又沽唔沽﹖

你有目標價，於是你從新研究過自己手上關於公司的資料，市場訊息等等。然後你很肯定自己的目標價是正確的。於是第一個情況，你沽出股票，而於第二個情況，你繼續持有，耐心等候股票回復你心目中的目標價。

你以為蟹貨是怎樣煉成的﹖

即係隻股票於你心目中其實只值$5，而你會於$7買入，期望有傻仔會將股票推至$10，給機會你沽出獲利﹖我相信世界上沒這種人。

大部分人是$7買入股票，相信該股票值$10，然後當股票跌至$5時堅持自己的判斷，繼續持有。

回到朋友的問題。當日騰訊收市大約是$411。我當時的回答是，就算升到$440，與現價比相差不到8%。如果一隻股票，你覺得升多8%就應該沽出，你應該現在就沽出。就算我當你的$440目標價完全正確，市場可以有很多原因令原本正確的事情最後不會發生。8%的價差，連一隻股票的正常波幅都不止這個數，根本不值得你花精神仔細考慮。

P.S.
1. 公司客戶持有騰訊
2. 即係咁，我都唔建議大家學我。我買股票，一年賺唔到50%嗰隻我當自己睇錯。而唔建議學嘅理由係，因為個問題會變成，老細問我隻隻股票我九成都睇唔順眼。你老細俾親野你你都BAN，你可想而知你嘅生活會係幾咁美滿幸福同快樂。

評瑞聲科技公告(2018.HK)

成段野最重要佢地想講嘅，唔係有冇俾過盈利預測。都多撚餘嘅，成班分析員山長水遠唻搵你，你一句預測都唔俾，D大行仲唔做你﹖你當我第一日出唻撈呀﹖

重點係第二句，即沒有提及「具體客戶業務」。

係人都知瑞聲最大客係Apple，要估啱瑞聲條數，計準Apple俾佢嘅單係最重要。問題係：

Apple係唔准佢嘅supplier向任何人講Apple俾左幾多單呢D supplier嘅。

係，瑞聲而家頭痕緊嘅，係前有沽空報告話佢枱底慳左錢唔俾Apple知，後有呢份報道話你向分析員披露Apple訂單。佢係驚Apple cut單。證監做野要講證據，冇證據話你講第二季數據俾人知，分析員大家估差唔多嘅數可以係巧合(雖然你諗都諗到唔會係巧合，連續幾份沽空報告咁出唻，你唔俾D實數人地大行睇下，鬼肯同你出份report叫人buy呀﹖就算真心信你，都借勢問你攞多D料啦)，但Apple cut單係可以完全唔駛俾理由，反正佢話要supplier, 成村人排住隊去報名。

Cut哂就應該唔會嘅，差在cut多定少啫，同埋Apple如果借d椅壓價，你40% GPM一keep唔住，股價企唔企得住就好成問題。

Sunny optical (2382.HK)

見cherry寫圖，我又寫下。

Sunny Optical盈喜後連升兩日。 我傾向覺得係peak out左。Uptrend line broken, 而且累計升幅都已經唔少。

但而家個市旺，大幅回落嘅機會唔大，可能短線回落後會橫行一段。

Fundamentals方面都係講左好多年嘅dual-cam同Vehicle-cam，奇在有sell side report連埋deep learning唻講，真係識就笑死唔識就嚇死。如果鏡頭關AI事，咁造鏡頭嗰塊玻璃都關。再講，車鏡炒左好多年喇，而家加個term又炒多一轉﹖

唔怪得阿媽教落炒飯要用隔夜冷飯炒。

BTW, 在下所屬公司冇持有2382長及短倉(真係失策...)

投資護城河

 https://thestandnews.com/society/%E8%BF%91%E6%97%A5%E4%BA%8B%E6%95%85%E9%A0%BB%E9%A0%BB-%E6%B8%AF%E9%90%B5%E5%A4%9A%E5%90%8D%E9%AB%98%E5%B1%A4%E5%8E%BB%E5%B9%B4%E7%85%A7%E5%8A%A0%E8%96%AA/

投資應該冷血。越冷血，就越冷靜，越能夠斷絕七情六欲揀好股票，一切賭場妓院鴉片農場，來者不拒，可以幫投資者賺到錢嘅公司，就係好嘅公司。

價值投資有云，投資必選有護城河。護城河者，次一級的，是競爭者難以搶奪市場；高級的，根本不存在競爭對手。真人真事，在下訪問某H股上市公司管理層如何看待新上市的某同類公司時，一副不屑的口吻，一腔純正的普通話答在下曰：「(該公司)是我們的競爭對手嗎﹖」

港鐵的護城河就好唔錯。這個世界，提供優質服務然後業績良好的公司，不能算是好的公司。要服務差到無倫，日日俾人雕花拆蟹，業績仍然一路向北，才是真正的好公司。正所謂百戰百勝者，非善之善者也；不戰而屈人之兵，善之善者也。

港鐵就係一間服務越唻越差，投訴越唻越多，然後業績越唻越好嘅公司。你一路鬧，一路嫌貴，一路要繼續幫襯，然後佢一路加價，一路加人工，而馬時亨條契弟繼續對住你笑淫淫。錢咁好搵，我做佢應該會笑得再高興D。

(筆者所屬公司未持有上述股票)

雞年買乜好?

朋友中知道在下從事投資行業的，過年時候都紛紛問同一個問題：今年買好乜﹖

真是個難答的問題，因為上年的答案全部不能重用，世界變得真快。

今年最清晰的必定是加息週期的開始。就算Federal未有提高利率，單單縮短債券年期，效果相約。由此中長線睇好保險及銀行股，睇淡香港樓市。其中保險及銀行股已開始升勢。但香港樓市似乎仍未有反應，美國高息債券指數則仍然上升。

大家好像還未相信低息環境已成過去，又或者仍然認為，香港過去數年住宅落成量不足令供應短缺，需求則因樓價過而被壓抑等等。這些當然都是事實。問題是由2000年開始，過去17年香港樓價與美國高息債券幾乎同步，足以反映此段時間內，香港樓價基本由利率主導，而非來自居民實際工資上升、生產力提高等因素影響。另外大陸亦開始加息，加上肖建華於香港被押返大陸，更雙重打擊大陸富商來港投資房產的意願。一旦大陸資金自香港房地產市場撤退，後果可想而知。

另外睇淡歐羅。英國退歐及美國Donald Trump當選，反映的是全球右傾趨勢，左仔的黃昏終於來臨。2017年，荷蘭會先於3月(3月15日)舉行議會選舉，法國4月及5月會進行總統大選，德國9月亦會有議會選舉，一旦有右翼政黨勝選，必定仿效英國為脫歐公投，歐羅必先下挫。

其他範疇則暫時未有特別看法。

以上。