十二月。
加息；唔加息；This is the question。昨晚聯儲局終於指通脹可能並非暫時性，提早Taper應該唔會有懸念。然後大部分投資者現時應該糾結於估計到底係咪會加息，如果加，會加幾多。而我嘅睇法係：
唔好估。
歷史上準確估中息口走勢嘅人唔係好多，而更重要嘅係，其實俾你估中，唔代表你操作正確。睇啱做錯嘅大有人在。所以而家應該花時間研究嘅，唔係到底會加幾多息，而係：
如果10年期美債息率let say升到2厘，你應該點做﹖
你出去問有買股票嘅人，十個有九個半都唔識答你，因為冇諗過。佢地淨係知加息個市會跌，咁估中加唔加息，咪知個市會唔會跌囉﹖知道個市會唔會跌仲唔夠﹖
梗係唔夠。今年未加過息丫，你睇港股咪一樣冇運行。同樣加1/4厘息，你揸嘅股票係唔怕風浪嘅，定係投機炒作一有風吹草動就要走嘅類型，操作方法就好唔同。投資者應該關心嘅，唔係個世界將會發生乜野事，而係應該判斷，一旦世界發生一件可預計會發生嘅事後，投資部署應該點樣反應。
我嘅high end半導體股一股未賣，但唔代表佢唔會跌，只係就算跌番兩三成我諗我都由得佢咁解。反正睇long term呢樣野應該仍然係全世界最要命嘅一種資源。
投機方面少量沽空弱勢嘅中概股就算。都係嗰句，習大大未連任前，應該都唔會盡興，有排搞。唔係最優質嘅股票，我係永遠唔會撈底，因為你永遠唔知間公司內部有乜野問題，係人地知得一清二楚，而你仲係懵閉閉。
P.S. 寫完TSM後即跌，咩啫，繼續等囉。
