Wednesday, January 26, 2022

初吉終亂

自一月起,美股幾乎跌個不停。升市時唔駛你講係人都識坐貨,咁跌市又應該點﹖

跟財演說完港股已死之後恆指幾乎是馬上反彈一樣,跌市當大家止蝕離場一片愁雲慘霧之際,大概就是博反彈的好時機。

雖然我咁講,不過我係唔會博反彈嘅。相反,我會趁反彈慢慢減持。

俄羅斯萬一打烏克蘭,對股市有乜影響﹖最差嘅後果係西方全面制裁,而制裁俄羅斯最大影響,就係能源價格被推高,然後加劇通脹。不過,俄羅斯佔全球能源供應太大,以今時今日美國及北約的軟弱,未必願意承擔這個後果。普京當然都係睇準呢點,唔係點會落手。

另外中國亦可能趁機突襲台灣,博大霧呢家野,我地呢啲蟻民真係唔好估。

不過,打仗對股市嘅影響從來都係短期嘅,到最後,可以預計嘅都只係加息問題。而現時股市估值偏高,一旦修正,對大部分人嘅股票portfolio或多或少會有影響。

我自己預計,納指大約回到萬五點左右,應該又會再繼續跌過。不過估點數從來都係好戇居嘅事,正確做法係逐步減持,唔好估。大方向睇淡,係我唔博反彈嘅原因。

持倉方面,領先嘅科技股我認為還是不要全面清倉較好,適量減持即可。二三線股則最好全面清倉。行業方面,最近除了銀行股,冇乜心水。至於保險股,相信還要點時間吧。

加密貨幣近年很流行,我一啲興趣都冇。原因有二。其一係因為我唔識背後嘅價格邏輯,唔識嘅野自然唔掂。其二係,佢同黃金一樣,冇息。加息週期買冇息嘅資產,你嫌錢腥不妨分啲俾我。

最後講講恆指。皆因被朋友埋怨太早轉MPF錯過了反彈。但我維持原判,以現時嘅基本因素睇,港股仍然冇運行。Time the market從來難,認清大方向及早部署,比逐個小波幅去捕捉,容易得多。

Sunday, January 2, 2022

戒急用忍

先是蘋果日報,然後是立場新聞,到今日的眾新聞。

這沒甚麼好可惜。想起以前讀過,文革時期,紅衞兵衝進著名作家沈從文的工作室,把珍藏的古本書籍都燒掉,還問他一句「你服不服﹖」。沈從文從容而答:「沒有甚麼不服。」

2021對投資而言回報絕對稱得上是好的一年,前提是你選擇的是美股而不是港股。所謂香港冇走資只是自欺欺人。股市陰跌,房價停滯,但別忘記另一邊美國大印銀紙,資產價格狂升,與美元掛鈎的港元資產不升反跌,如果咁樣叫做冇走資,這個世界就沒有「走資」這回事。

再加上下年美國收水,美元加息,香港本身的走資因素,港元計價的資產下年好難仲有運行。係,今年港股跑輸全球主要股市,但唔代表下年就會好轉。所謂物極必反否極泰來,源於古人對四季更替的觀察。問題係,世事並不總是如四季般運轉。相反,現代企業有護城河,而出色的公司懂得利用自身優勢建立更深厚的護城河,以攻為守,優勢不斷加厚鞏固,進而良性循環,股價拾級而上。然後利用高股價配股集資,再利用所得投資良好業務。所謂投資,無非就是找出這些企業,持有然後等待。

曾經我也有過疑問。做投資這行,其實好像對世界沒有甚麼貢獻,只為自己謀利。我的一位舊同事答得好:投資的貢獻,就是令良好的公司有良好的股價,然後當他們需要額外資金時,不用以低殘的股價,而是用合理的價錢集資,從而繼續發展良好的業務。所以良好的投資人,是對世界有益的。

如果還想投資港股,該問,港股有否這種企業﹖無疑騰訊阿里等曾經是優秀的企業,但政府積極干預下,短期難有作為。

時不利兮,這種企業還是忍一忍手吧。師兄教過,日本戰國大名德川家康成功之道,無非「戒急用忍」四字。靜待時機,也是修為的一種。

Saturday, January 1, 2022

Jan 2022

實在說不出新年快樂這種混帳的話。21年的事,不說也罷,反正過了等於沒過。歸根究底,有人嫌自己紗帽小嘛。

歲末交投淡薄,無事可記。22年加息已成定局,不過如果閣下想增持因加息而利好的行業,可能已經遲了幾步。估值唔太離譜嘅,增持少少啦。

高估值股票風險日增,護城河不深,沒有持續創新,增長難以長期保證的股票,減持為妙。但我自己,有持續創新能力的股票,仍然堅持持有中。

反正,沒人強逼你一定要買股票的。

至於有強逼的強積金,還是投資北美市場較佳。切忌選預設投資,因為很可能於下半年加入大陸的未評級債務。

中概股雖然估值漸趨吸引,但記住,股票估值很少是合理的,不是偏高就是偏低,加上大陸經營環境仍然惡劣,暫時而言還是少沾手為妙。現在的情況是,大陸有經營優勢的民企被政府針對,沒優勢的民企買唻多餘,而國企又進取不足,簡單而言冇隻買得落手。