Apr 2022

四月。

點解不停強調要放棄港股，你睇下保險股就明。美國上市嘅保險股已經升到你唔會買之際，香港上市嘅保險股就仲喺度尋緊底。

係呀，加息利好保險股呀，然後市況唔就，投資左大陸房地產等等，總之幾十樣理由令到你睇中嗰隻唔升。睇錯輸錢就心甘命抵。睇中都輸錢你玩埋我嗰份。如果唔係香港有一大堆MPF，然後又一大堆打工仔懶得理自己個MPF portfolio求求其聽人點買港股，應該就唔止跌呢個數。

Smart Money好現實，永遠會搵最好賺嘅地方賺錢。你睇港股一池死水，十幾年得個吉，你係D鬼佬管住幾百億做價值投資，會唔會價值投資港股﹖

投資界其中一樣最誤人嘅說話就係價值投資，然後大部分人就因為咁要等股價跌先捨得買股票，因為咁樣先有足夠嘅「安全邊際」。唔係唔啱，你買嗰隻股票真係全世界最優質嘅企業就係嘅。同埋你要分到主力資金係因為乜野原因走貨。如果係大量贖回，或者資金鏈出問題而被逼走貨，你啱。但如果唔係，而係D資金用腳投票走人，你走去接貨，都唔係唔得，可能你啱呢係咪﹖

正所謂熊貓都會生仔丫，機會好微囉但係。

所以港股係咪真係唔買得，唔係。你等佢升番D先。個市見底，同個市回升，係兩個概念唻。唔好成日覺得個市見底就撲入去，有排你等呀。