從Tesla學到的事

Tesla升左咁多，我真心唔建議而家高追，不過唔高追，唔代表唔可以研究。相反，你可以學到好多野。

1. 買股票要贏錢，其實唔駛賭唔駛估，Tesla爆升，其實冇乜hidden information，呢十萬架車嘅單，唔係而家簽，遲早都會有租車公司同佢簽。我想講嘅係，好嘅公司，你就算唔知佢幾時升，總之你知佢總有一日會爆升嘅，唔駛太理時間點嘅。個價唔太離譜，你就買啦。

咁而家又唔高追﹖係呀，好股，揀橫行位入，心理壓力少好多。真係咁驚坐貨嘅，咪等佢創新高嗰日入囉，冇壞。坐到3-4成loss面不改容嘅，其實而家都可以，不過我自己就唔太受到咁解。

2. 咁點判斷一間公司好壞﹖基本財務報表當然要識睇。不過呢D hard fact都唔駛我喺度講喇。好嘅公司爆升，通常D product其實通街都知道好，而唔係有新product出嘅時候。

所以通常公司出新野，股價升完一輪就會跌番，睇呢D消息炒股，通常損手收場。正確嘅做法係搵一間公司product已經出左幾個月至年幾，反應好好，而股價終於升穿橫行區嘅。

Apple翻生爆升，係當年iPod已經賣到成行成市嘅時候，而唔係啱啱推出iPod嗰陣。Nvidia爆升，係已經壟斷左high end display card市場嘅時候，等等。

淨番嘅就係耐性，我估如果有買tesla嘅，呢幾日點都有諗過好唔好短期take profit嘅。老實講我都有諗過，但最後決定一動不如一靜。無他，心理上，拿住profit坐貨，比沽完之後高追容易好多。

真係唔識嘅，你買指數啦，10月至今標普都升左7.5%，幾和味。